A escribir relatos e novelas tamén se aprende. Nas tardes dos venres deste mes e durante dúas horas e media, o escritor Xosé Monteagudo imparte un taller de narrativa a un grupo de alumnos de distintas idades e aspiracións. O autor das novelas As voces da noticia , Esta historia e Un tipo listo , di que é fundamental ter afección pola literatura, «porque como dicía Fluabert, o xenio dáo Deus, nácese con el, pero o talento, neste caso para escribir, haino que traballar e ter ilusión»
-¿Que programa lles vai ensinar?
-Trátase de mostrarlles as técnicas narrativas e os estilos literarios, de ensinarlles a traballar a estrutura, puntos de vista e outros elementos básicos da arte narrativa. Pero ademais da teoría, en cada sesión faremos exercicios prácticos.
-¿Basearase na súa experiencia?
-Si, porque se ben hai uns coñecementos teóricos lóxicos dos que partir, é evidente que do que mellor lles podo falar é froito da miña experiencia como escritor, porque aparte de facer ficción un autor reflexiona.
-¿Dos erros apréndese?
-Si, e van ter que aprender deles, como todo o mundo, pero hainos que se poden evitar, e por iso un dos obxectivos que me propoño é aforrarlles aos que queiran escribir que cometan algúns habituais cando se empeza.
-¿Imparte estes talleres a miúdo?
-Din algúns obradoiros coma este, pero sempre foi en institutos. É a primeira vez que vou dalo nunha biblioteca e uns alumnos máis diversos.