Pablo Meixe, o ordense que fai rir a 150.000 persoas cada día coas súas bromas en Instagram

Case 150.000 persoas rin cada día coas bromas que Pablo Meixe (Ordes, 1993) sube a Instagram. Esa rede social converteuse durante a pandemia no gran escaparate que o achegou ao público maioritario. Pero el ten todo o mérito porque o seu traballo convence e funciona. Os seus vídeos, nos que bromea con cousas cotiás ou interpreta distintas personalidades tipo, acumulan miles e miles de me gusta e provocan en quen os ve unha empatía instantánea e unha desconexión absoluta con calquera problema do mundo real. Tanta creatividade e capacidade interpretativa levárono a ter o seu propio espectáculo, un monólogo co que se recorreu España.

Pablo Meixe ten unha risa aguda, de esas contaxiosas, que utiliza cada pouco para maquillar a súa timidez. Fai uns meses deixou Ordes e mudouse a Madrid para tratar de abrirse camiño profesional. Xa alí encargouse de presentar o backstage dos Goya xunto a tamén cómica Inés Hernand. «A verdade é que estou cómodo alí tamén. Dáme pena por todo o que perdo ao estar lonxe, pero teño moitas máis oportunidades e estou contento», afirma. Volve cada pouco a casa e de feito Galicia, os galegos e a propia lingua son protagonistas en moitos dos seus traballos. «Aquí están as miñas raíces e encántame estar moi conectado con elas. Ademais de volver a visitar á miña xente, eu empecei a xogar grazas ás oportunidades que me deron en locais e en municipios pequenos para facer os meus monólogos e agora volvo sempre que me chaman por unha cuestión de agradecemento tamén», relata.

Pablo Meixe admite que na súa familia están un pouco fartos das súas grazas. «Adoito facer bromas algo pesadas. No día dos Inocentes teñen medo da que podo liar, pero en xeral están contentos comigo», confesa, entre risas. Levan moitos anos aguantando ao rapaz, que se aficionou aos monólogos con 15 anos e escribiu un propio con 17. «Xa facía teatro e en canto me puxeron internet na casa o primeiro que fixen foi buscar a cómicos en YouTube e enganchoume», di o ordense.

Entre os seus referentes hai centos de humoristas, pero destaca a David Perdomo, Raúl Cimas, Silvia Abril ou Luchonce. «Agora, coas redes, temos que conseguir facer rir en vídeos de doce segundos. Creo que o humor muta de forma pero sempre está aí», afirma Meixe. A finais de ano verá a luz o seu novo espectáculo, un número que reúne música, audiovisual, interpretación e moita comedia.

---

---

---