El Muséu Etnográficu de Grandas de Salime «Pepe'l Ferreiro» celebra'l so 40 aniversariu
COLES
La celebración del aniversariu empecipia esti mesmu fin de semana con una actividá el 11 de mayu na que Xosé Ambas y Ramses Ilesies van facer un percorríu pelos distintos tipos y ritmos de la música tradicional asturiana
08 may 2024 . Actualizado a las 16:03 h.Esposiciones temporales conmemoratives, un itinerariu interpretativu, xornaes de puertes abiertes, charres-alderique y presentaciones, meses redondes, una xunta de ferreiros, visites especiales o una intervención artística de María del Roxo. Eses son les actividaes coles que'l Muséu Etnográficu de Grandas de Salime «Pepe'l Ferreiro» celebra'l so 40 aniversariu, dende qu'abriera un 2 de xunu de 1984 con un primer montaxe espositivu nel baxu de la Casa Conceyu, enantes de treslladar la colección en 1989 a l'antigua Casa Rectoral de Grandas de Salime.
La celebración del aniversariu empecipia esti mesmu fin de semana con una actividá el 11 de mayu na que Xosé Ambas y Ramses Ilesies van facer un percorríu pelos distintos tipos y ritmos de la música tradicional asturiana, nun conciertu-taller nel que tamién va haber espaciu pal baille con Eva Braga y Nel Villanueva. Al día siguiente, col Archivu de la Tradición Oral d'Ambás (ATOAM), va haber un percorríu especial pel Muséu col patrimoniu oral como filu conductor, nuna visita que ta empobinada a vecinos y vecines del conceyu, mesmo qu'a miembros de l'Asociación d'Amigos del Muséu y de l'Asociación Cultural El Carpio.
El 18 de mayu, coincidiendo col Día de los Museos, va proyéctase'l documental Frutos d’úa terra: memoria inmaterial da etnografía alimentaria / Frutos d'una tierra. Memoria inmaterial de la etnografía alimentaria de la Fundación Parque Históricu del Navia y va haber una charra-alderique y mientres esa fin de selmana, los díes 18 y 19, van sacase los xuegos tradicionales al esterior.
El Muséu va empezar el mes de xunu celebrando dos xornaes de puertes abiertes, el 1 y 2 de xunu, con una programación especial y gratuita na que va haber demostraciones d'artesanía y llabores cotidianos, tasties gastronómiques, música tradicional y xuegos. El día 1 tamién se va celebrar la primer mesa redonda de les Xornaes de Patrimoniu Cultural sol nome “Pepe'l Ferreiro”. Nesta primer cita va falase sobre la formación d'esti singular Muséu y les Xornaes van incluyir dos sesiones más: el 13 de xunetu sobre oficios tradicionales y el 24 d'agostu sobre comunidá y patrimoniu.
Amás, el 2 de xunu va inaugurase la esposición fotográfica y audiovisual Amigos del Muséu: somos patrimoniu, na que l'Asociación d'Amigos del Muséu fai un repás de cómo evolucionó la so actividá nestos años y cómo ye posible xenerar identidá y comunidá al rodiu d'un Muséu; y l'itinerariu interpretativu 40 años en 40 pieces, nel que s'escoyeron 40 pieces espuestes nel centru qu'ilustren el crecimientu del Muséu nestes cuatro décades y l'amplitú temática de les sos colecciones.
Coles mesmes, mientres el mes de xunu, aquellos visitantes que s'averen al equipamientu y que nacieren un 2 de xunu ente 1984 y 2024, día d'apertura del Muséu, van poder llevar de regalu una pieza de tornería realizada pol artesanu Arturo Iglesias.
El Muséu tamién va abrir les sos puertes a espresiones artístiques contemporanees de la mano de l'artista María del Roxo, que va realizar un mural figurativu nel equipamientu del 4 al 14 de xunu, col que pretende facilitase al públicu la interpretación de cómo yeren homes y muyeres de toles edaes que conformaben les comunidaes del Occidente d'Asturies.
El 15 de xunu inaugúrase la esposición Contando los 40, una amuesa audiovisual y fotográfica conmemorativa na que se va repasar la evolución de la institución museística dende la so fundación hasta güei. A partir del 20 de xunu y hasta'l mes d'ochobre, nel marcu d'esta esposición van facese visites guiaes a esti espaciu y a la sala “Pepe'l Ferreiro”, na que se va esplicar quién, cómo y por qué dio llugar a la creación del Muséu y cuáles son les característiques que lu convirtieron nun centru etnográficu de referencia.
El Muséu va acoyer la celebración de la festividá de San Xuan cola Asociación d'Amigos del Muséu'l 22 de xunu, día nel que tamién se va grabar nel centru'l podcast Historias del Camino de Santiago Primitivo, dirixíu por Roberto Naveiras, nuna edición especial na que se van grabar entevistes, testimonios, anécdotes y vídeos con persones relevantes na hestoria del Muséu.
Esti branu tamién va haber xuegos tradicionales, visites temátiques pa conocer los almacenes llabradores (horru, panera y cabazu), percorríos guiaos pol Muséu y demostraciones de tornería y forxa. A esto han sumase otres feches destacaes: la Fundación Parque Históricu del Navia va presentar el catálogu y mapa del proyectu Paisajes de la Industria/Paisaxes da Industria'l 27 de xunetu; los miembros de l'Asociación d'Amigos del Muséu van compartir col públicu visitante alcordances, vivencies y conocencia de les pieces de la colección museística'l 7, 9 y 13 d'agostu en Contos da mia casa/Historias de mi casa; va realizase la mallega'l 17 d'agostu; y diez ferreiros van axuntase nel Muséu'l 13 y 14 de setiembre pa trabayar de manera coordinada na ellaboración d'una pieza singular, diseñada pal 40º Aniversariu.
Pal públicu escolar de la zona hai dos feches señalaes: el 14 de mayu va haber una xornada de convivencia nel Muséu del alumnáu del C.P. El Salvador de Grandas de Salime y del C.P.Y.B. Aurelio Menéndez de Ibias; y el día 22 d'esi mesmu mes l'alumnáu del C.P. El Salvador va volver al centru nel marcu del proyectu El Parque Históricu fala pa conocer los pormenores de la cocina lareira.