O certame literario Antón Avilés de Taramancos pon en xogo un premio de 3.000 euros
BARBANZA
Os orixinais poden presentarse ata o 20 de outubro
12 jul 2023 . Actualizado a las 05:00 h.Un único premio de 3.000 euros, unha escultura conmemorativa firmada polo artista Alfonso Costa e a publicación da obra pola Editorial Toxosoutos. Ese é o galardón ao que poden aspirar aquelas persoas que concorran a esta edición do certame literario Antón Avilés de Taramancos, que impulsa o Concello de Noia desde hai 22 anos. O prazo de presentación de orixinais estará aberto ata o próximo 20 de outubro, e poderán presentar os seus relatos de aventuras todos aqueles autores maiores de idade —de calquera nacionalidade—, que aporten un traballo en galego de temática libre e que sexa inédito.
A obra deberá ter unha extensión de entre 70.000 e 100.000 caracteres, e deberán axuntarse catro copias dos exemplares por separado, mecanografados por unha soa cara, debidamente grampados, cosidos ou encadernados, sen firma, cun lema e utilizando o sistema de plica.
Xurado
A obra terá que enviarse ao Concello de Noia (rúa Rosalía de Castro, 2), e o xurado está previsto que emita o seu veredicto na segunda quincena do mes de decembro. A entrega do premio farase mediante transferencia bancaria e organizarase un acto oficial.
Segundo as bases, os traballos non premiados serán devoltos, previa solicitude, e os restantes serán destruídos transcorridos 20 días desde a data do veredicto do certame. A Editorial Toxosoutos publicará a obra galardoada, renunciando o autor aos dereitos da primeira edición, tanto en galego coma noutros idiomas de posible publicación por parte da devandita empresa editora.