«Vexo que hai unha enorme e cada día máis grande confianza no Partido Popular»

É un alcalde con moi longa experiencia no cargo. Armando Castosa Alvariño (Cospeito, 1963) é candidato ao Senado polo PP. O seu presidente provincial, José Manuel Barreiro, buscou para configurar as listas para as eleccións xerais a sólidos valores populares na política municipal. E un deses valores é Castosa Alvariño, alcalde de Cospeito, que está no seu quinto mandato á fronte deste Concello da provincia de Lugo.

-No caso de saír elixido, ¿non vai ter problemas para compatibilizar o traballo na alcaldía e no Senado?

-Non. Son facilmente compatibles. Ao Senado hai que ir unha vez cada quince días e non se entorpece o traballo municipal.

-¿Que aportaría a Cospeito o feito de que vostede fose senador?

-Penso que todos os veciños verían como algo bo que o seu alcalde fose senador, pero penso que se pode facer extensible á Terra Cha e á provincia de Lugo. Sempre é bo ter voz noutros ámbitos institucionais.

-Como todas as campañas, é un tempo de moito traballo...

-No partido organizámonos en función de distintos criterios, pero atendendo en parte á representación territorial. Quero dicir que no caso dos candidatos ao Senado facemos campaña máis centrados nas nosas respectivas zonas, e, como é lóxico, acudimos aos actos nos que temos que estar todos. Aquí, na Terra Cha, fago campaña todos os días.

-Parece que o resulta das eleccións pode estar moi axustado...

-Eu creo que a moeda está no tellado. Teño que dicir que vexo o ambiente moito máis favorable ao PP nestes momentos que cando empezamos a precampaña; sen dúbida, moito máis favorable. Aínda que as enquisas indican que hai practicamente un empate técnico, eu vexo que hai unha enorme e cada día máis grande confianza no PP. Isto nótase falando coa xente, e eu falo con moita. Paréceme que na provincia esa confianza vai quedar plasmada no resultado electoral. Agora mesmo eu creo que o PP está claramente por riba do PSOE. Xa pasou nas eleccións municipais; as enquisas daban gañador ao PSOE e finalmente, en conxunto, o ganador foi o PP. Creo que esa tendencia que se deu nas municipais vaise manter nas próximas eleccións xerais.

-¿Hai ou non hai crispación?

-Eu non vexo que houbera tanta crispación na lexislatura nin vexo que a haxa agora. Loxicamente, Goberno e oposición teñen visións distintas e por dicir que non se está de acordo non se provoca crispación. No meu entorno esa palabra úsaa moi pouca xente. Eu vexo as cousas moi normais, con bastante saúde democrática. Creo que todo este asunto da suposta crispación é algo moito máis mediático que real, polo menos no meu entorno.