Entrevista | ana dobarro artista lalinense «Seguro que a miña postal de Nadal será moi colorista»

A máis de dous meses para a celebración das festas do Nadal, o Concello de Lalín deixou en mans dun artista a elaboración da postal navideña coa que felicitará as festas aos veciños do termo municipal. Nesta ocasión a encargada do tarxetón é Ana Dobarro, unha xove artista local licenciada en Belas Artes pola Universidade de Vigo.

-¿Como recibe esta petición por parte do Concello de Lalín?

-Con moita sorpresa. Ao ser unha lalinense de toda a vida, a verdade é que me fai moita ilusión que me fixeran este encargo.

-¿É responsabilidade?

-Sí que o é. Con esta postal chegas a todos os fogares, entrarás en todas as casas dos lalinenses e é unha fonda responsabilidade.

-Resta aínda un par de meses para as vindeiras festas navideñas pero, ¿xa ten idea de como será a felicitación?

-Penso que irá na liña do que eu fago habitualmente. E, para aqueles que non viron ningún traballo eur, decirlle que son moi colorista. Por iso, seguro que a miña postal de Nadal será moi colorista. Ou, ¿non? A ver se me dá por facela en branco e negro (risas).

-¿Algún boceto feito a día de hoxe?

-Bueno... Retratarei algo o Nadal... Moita cor... O que pretendo é ter a obra rematada neste mesmo mes. A miña intención é poder entregala antes de que remate outubro por se é preciso cambiar algo. Mellor rematala o antes posible para que non haxa agobios de última hora.

-¿Como definiría a súa obra?

-Non é nada doado definir o traballo que fai un mesmo. Sempre é mellor que o público o vexa e xulgue se lle gusta ou non. Penso que son surrealista e colorista.

-Por certo, ¿algunha outra vez fixo unha postal destas características?

-Pois creo que fixen algunha sendo cativiña. Dende entón, penso que ninguhna máis.

-A pesares da súa xuventude ten no seu haber xa algunhas exposicións dentro e fóra da comarca...

-Estiven amosando as miñas creacións na Facultade de Belas Artes de Pontevedra, e tamén participei en exposicións no Museo das Artes de Riveira, no Museo Municipal de Lalín e tamén na Fundación A Solaina de Piloño.

-¿Para cando unha mostra individual de Ana Dobarro na zona?

-Espero que axiña. De momento non hai ningunha data fixada pero é a miña intención poder facer unha exposición aquí para que se coñezan os meus traballos. Así o público poderá opinar...

-A Fundación Casa Museo A Solaina de Piloño colgará en novembro nas salas do Museo Municipal de Lalín os traballos realizados na pasada xuntanza de artistas, alí estivo Ana Dobarro.

-Foi unha experiencia moi positiva. Fixéronse traballos moi interesantes na Solaina. Tiven a oportunidade de estar alí e de traballar. Agora, dende principios de novembro, amosaranse as obras feitas na xuntanza á que asistiron artistas de distintos rincóns do mundo.