Cinco balonmanistas do Rasoeiro xogan dous torneos internacionais con Galicia

O traballo de base do Rasoeiro vén de recibir un novo recoñecemento coa convocatoria de cinco das xogadoras do club para os vindeiros compromisos das seleccións galegas cadete e xuvenil femininas.

Na primeira das categorías, Andrea Pintos, Uxía Fontoira e Aurora Garrido desprázanse a León para disputar o Torneo Internacional da mencionada localidade. Nela, o combinado galaico mediráse o domingo ás dez e cuarto da mañá co equipo portugués ADC de Braga, e o luns ás doce menos cuarto da mañá coa selección de Castela-León. O grovense Queco Fresco viaxa coas tres xogadoras do Rasoeiro coma xefe de expedición.

Ademais, o club meco estará representado tamén no Torneo Internacional Trofeo Bufete Nogues que durante os mesmos días se celebrará en Valladolid. Neste caso, da man das xogadoras xuvenís Carla Casal Outón e María Jesús Longueira Martínez. As galegas mediránse o domingo a partir das dez da mañá á selección da Comunidad Valenciana. O gañador disputará a final do torneo ao día seguinte ao mediodía, e o perdedor terá que conformarse coa final de consolación, un par de horas antes. O Rasoeiro é o terceiro club que máis xogadoras proporciona a Galicia para o seu compromiso en Valladolid tralo Porriño, con media ducia de balonmanistas, e o Atlético Guardés, con cinco.

Tanto o torneo de León coma o de Valladolid están enmarcados no plan de traballo da Federación Galega de Balonmán coa vista posta no vindeiro Campionato de España de Seleccións Autonómicas, fixado do 2 ao 8 de xaneiro en Valladolid.